La Notte dei Morti nel Veneto contadino...

LA NOTE DEI MORTI NEL VENETO
Al dì de la gloria in ricordo dei Santi
la note tien drio de quei che xe in tanti.
Le fiame che trema nel campo dei Morti
più scuri fa vedar i campi e i Orti.
Portando ‘l ritrato de un qualche parente
ancora se move un poca de zente.
Ombre che cala
verso la sera
porta al ricordo
de chi ghe gera;
de le campane
sto gran susìo
el fa rivivar
l’ultimo adio.
Traverso i campi
con inquiete onde
da un borgo a l’altro
le se risponde.
I veci prega
ne le campagne
fin che sul fogo
sta le castagne.
A sto pregar se unisse le legende
che tetre anca de più la piova rende.
Conta storie e paure quei che vegia,
muta in teror li scolta la famegia.
La porta un colpo dà, sbatua dal vento:
strenze ‘l so ceo la mama co spavento.
‘Na sera dei Morti
del tempo passà
su un caro tornava
Gigeto soldà.
Sta volta ‘l tornava,
sul serio, dabon:
el gera sta in guera
co Napoleon.
Sul caro, ben sconto,
un vaso pressioso
robà in te ‘na cesa,
viagiava col toso.
So mare spetava
darente a un lagheto
ch‘el toso tornasse,
pregando pianeto.
Un troto lontan
se leva dal gnente:
cavali che core
co un batar cressente.
De rode un criar
più forte se alsava
man man che quel caro
più avanti ‘l rivava.
Za poco mancava
ch ‘el fio fusse là:
da ‘na cortelada
el gera massà.
In quela finisse
del troto ‘l pestar
e anca del caro
se ferma ‘l scrissar.
Nel bruto momento
la povara Rita
capisse ch‘el toso
ga perso la vita.
Sto fato tremendo
el fa vegner muta
de colpo sta dona
che in aqua se buta.
La sera dei Morti,
più ancora col vento,
dal fondo del lago
vien fora un lamento
co rode che cria
ancora lontane
de un caro ormai fermo,
e son de campane
co un batar de sòcoli,
sbagiar de un cagneto:
xe l’anema persa
del poro Gigeto...
Nissun però mai
pol vedar sto lago:
lo pol solo chi
strigà xe da un mago...
Andè pur in longo, campane, a sonar!
che i vivi sta sera i ga da pregar,
de quei che no xe ricordarse i aspeti,
far vivar ancora memorie e afeti.
Nel simitero
in procession
se move i Morti
drio de sto son;
i se lamenta
a bassa vose,
l’ultimo morto
porta la crose.
Testa calada,
sconte le man,
sta fila longa
vien da lontan.
Ancora, campane, no steve a fermar!
che i Morti sta note i ga da tornar:
xe solo ‘na volta in tuto un ano
e chi ve contrasta pol farghe anca un
dano..
Desso più chieti
se fa i lamenti
via via che passa
ore e momenti.
Se sbianca el çielo,
se desfa in tera
de qualche mòcolo
l’ultima çera:
de andar i Morti
i ga premura
là dove ‘l tempo
no se misura.
Ormai se conclude sta note de pianto,
se sbanda quei spiriti pal camposanto
e muti tra piera incrosandose e piera
sfantandose i torna là dove che i gera.
Ste storie e sti fati
che par dei misteri,
barufa col ciaro:
chi sa se i xe veri!
Ancora dei boti
intorno se perde
tra fogie che casca,
che lassa ‘l so verde.
Par nebia più sbiava
su campi e su orti
se fa za matina:
xe ‘l zorno dei Morti.

Ma drento el campanil
quei che ga tegnuo duro
butai de qua e de là,
le schene contro el muro,
coi piè che varda in fora,
le gambe ben slargae,
i ronfa co le sbèssole
sul stomego pontae,
tra un biscolar de corde
e faschi roversai
e scorse de castagne:
tuti ciochi spolpai..

(Giacomo Dal Maistro)



PER FAVORE NON COPIA.INCOLLARE!
SE TI PIACE IL MIO LAVORO SCRIVIMI UN COMMENTO QUI SOTTO E TE NE INVIERO' GRATUITAMENTE UNA COPIA IN PDF!
GRAZIE!!!